Lisensiya

Hindi lisensiya ang pagiging tama,
Upang magsabi ng masama sa kapwa.

Hindi lisensiya ang pagiging mayaman,
Upang mang-api ng abang kababayan,

Hindi lisensiya ang pagiging mahirap,
Upang maging tamad at umasa na lamang.

Hindi lisensiya ang mabigo o masaktan,
Upang magmukmok na lamang maghapon.

Hindi lisensiya ang pisikal na kapansanan,
Upang maging ordinaryong tao na lamang.

Hindi lisensiya ang pagiging edukado,
Upang mang-abuso ng mangmang.

Hindi lisensiya ang pag-unlad ng bayan,
Upang lapastanganin ang Inang-Kalikasan.

Hindi lisensiya ang pagiging lider ng bayan.
Upang abusuhin at pagnakawan ang bayan.

At hindi lisensiya ang pagiging abala,
Upang ang Diyos natin ay kalimutan.

Ngunit sapat na lisensiya ang pagiging tao,
Upang ang mali ng sarili at kapwa ay iwasto.

- Pitik-Bulag